Əhməd Şahidov 31 Avqust 1982-ci ildə Qax rayonunda anadan olub.
1999-cu ildə Bakı şəhəri Binəqədi rayonu 83 saylı məktəb-liseyi bitirib.
1999-2003-cü illərdə Bakı Slavyan Universitetinin “Rus dili və ədəbiyyatı” fakültəsində bakalavr təhsili alıb, 2003-2005-ci illərdə Bakı Slavyan Universitetinin Magistratura pilləsində, 2005-2008-ci illərdə isə Bakı Slavyan Universitetinin Aspirantura şöbəsində təhsilini davam etdirib.
2009-cu ildə Azərbaycan Respublikasının Prezidenti yanında Ali Attestasiya Komissiyasının qərarı ilə Filologiya üzrə Fəlsəfə Doktoru elmi dərəcəsini qazanıb.
2009-2014-cü illərdə Rusiyanın paytaxtı Moskva şəhərində Rusiya Federasiyası Prezidenti yanında Dövlət İdarəçilik Akademiyasının “Hüquq” fakültəsinin “Dövlət Hüququ” ixtisası üzrə təhsil alıb. Ali təhsilli hüquqşünasdır.
2011-2012-ci illərdə Azərbaycan Respublikasının Milli Məclisində çalışıb.
2013-2014-cü illərdə TURSAM Strateji Araşdırmalar Mərkəzinin baş katibi vəzifəsində çalışıb. TURSAM rəhbəri kimi Türkiyə, Şimali Kipr, Qazaxıstan, Qırğızıstan və digər türkdilli muxtar respublikalarda keçirilən beynəlxalq tədbir və konfranslarda iştirak edib, Türk Birliyinin zəruriliyi barədə çoxsaylı çıxışlar edib.
2014-cü ildən başlayaraq, Azərbaycan Demokratiya və İnsan Haqları İnstitutunun (www.aidhr.org) rəhbəridir. Dünyanın bir çox ölkələrində Azərbaycan həqiqətlərinin çatdırılması və Ermənistan-Azərbaycan-Dağlıq Qarabağ münaqişəsinin humanitar fəsadlarının dünya ictimaiyyətinə doğru-dürüst təqdim edilməsi istiqamətində fəaliyyətləri var.
ATƏT, AŞPA, BMT və digər beynəlxalq nüfuzlu təşkilatlarda Azərbaycanın milli maraqlarının qorunması, xüsusən də azərbaycanlı qaçqın və məcburi köçkünlər, habelə əsir və girovlarımızla bağlı çoxsaylı çıxışlar və məruzələr edib.
01 Noyabr 2015-ci il tarixində Azərbaycanda keçirilmiş Milli Məclisə seçkilər zamanı 112 saylı Qax seçki dairəsindən deputatlığa namizəd olub. Mərkəzi Seçki Komissiyasının elan etdiyi rəsmi nəticələrə görə, 2735 səslə II yerdə qərarlaşıb. Bitərəfdir.
2018-ci ildən başlayaraq, Azərbaycanlı Əsir və Girovlarla bağlı Məlumat Mərkəzinin (www.hostages.az) rəhbəridir. Azərbaycanlı girovlar Dilqəm Əsgərov və Şahbaz Quliyevin qeyri-qanuni olaraq, erməni girovluğunda saxlanılması ilə bağlı həm ölkə daxilində, həm də Azərbaycandan kənarda, bir sıra beynəlxalq təşkilatlarda çoxsaylı çıxışlar edib və bugün də azərbaycanlı girovların azadlığı uğrunda fəaliyyətini davam etdirir.
Azərbaycan diasporasının güclənməsi və erməni yalanlarına qarşı effektiv mübarizə aparması məqsədilə bir sıra layihələrə imza atan Əhməd Şahidov dünyanın bir sıra ölkələrində Azərbaycan diasporasının fəalları ilə birlikdə tədbir, konfrans, aksiya və mitinqlər təşkil etmiş, Ermənistanın Avropadakı səfirlikləri qarşısında dəfələrlə etiraz aksiyalarında iştirak etmişdir. Bundan başqa, Azərbaycanın dövlət diaspora siyasətinə dəstək məqsədilə Diaspora.az portalını yaratmış və hazırda bu saytın baş redaktorudur.
09 Fevral 2020-ci il tarixində Azərbaycanda keçirilmiş Milli Məclisə növbədənkənar seçkilər zamanı 112 saylı Qax seçki dairəsindən deputatlığa namizəd olub. Mərkəzi Seçki Komissiyasının elan etdiyi rəsmi nəticələrə görə, 4186 səslə II yerdə qərarlaşıb. Bitərəfdir.
6 kitab müəllifi olan Əhməd Şahidov zaman-zaman dövrü mətbuatda bədii-publisistik və ictimai-siyasi məqalələrlə çıxış edir.
Rus və ingilis dillərində sərbəst danışır. Ailəlidir, iki övladı var.
Əhməd Şahidovun sosial şəbəkələrdəki hesabları:
Facebook: https://www.facebook.com/shahidovcom
YouTube: https://www.youtube.com/shahidovcom
Instagram: https://www.instagram.com/shahidovcom
Twitter: https://www.twitter.com/shahidovcom
Skype: ahmad.shahidov1
WhatsApp: +99450 372 87 30